Mae'r Trefnwyr
Coleg Telyn Cymru
Coleg Telyn Cymru sydd yn gyfrifol am holl drefniadau’r Ŵyl. Sefydlwyd Coleg Telyn Cymru (rhif elusen 101978) gan Elinor Bennett, Meinir Heulyn a Gillian Green ym 1988, gyda’r bwriad o hybu celfyddyd y delyn yng Nghymru. Trefnwyd cyrsiau, gweithgareddau, cyngherddau a darlithiau ar raddfa eang, yng Ngregynog, Aberystwyth, Llangrannog, a chanolfannau diwylliannol eraill.
Pwyllgor Gweithredol yr Ŵyl a’r Gystadleuaeth
Elinor Bennett : Cadeirydd. Graddiodd yn y Gyfraith cyn mynd i’r Academi Gerdd Frenhinol yn Llundain, lle bu’n ddisgybl i Osian Ellis, a chanu’r delyn gyda phrif gerddorfeydd Prydain. Wedi dychwelyd i Gymru, parhaodd ei gyrfa rhyngwladol fel telynores gan droi ei llaw at ddysgu, cerddoriaeth siambr, recordio, a beirniadu’n genedlaethol a rhyng-genedlaethol. Cyhoeddwyd ei hunan-gofiant, ‘Tannau Tynion’ yn 2011. |
Caryl Thomas: Ysgrifennydd. Graddiodd Caryl o Goleg Cerdd a Drama Cymru, cyn mynd i Efrog Newydd, lle’r ennillodd radd M.A. . Perfformiodd fel unawdydd disglair yn rhyngwladol ac ymddangosodd yn rheolaidd ar y radio a theledu. Yn 2011 fe’i hapwyntiwyd i swydd Pennaeth Astudiaethau Telyn ei hen goleg. Ar wahan i’w disgyblion coleg, mae ganddi hefyd lu o ddisgyblion ifainc disglair, a hi oedd Llywydd Gŵyl Delynau Ewrob (Caerdydd) yn 2007. |
Meinir Heulyn: Trysorydd. Graddiodd Meinir o Brifysgol Cymru ac o Gonserfatorio Genoa cyn ymuno â Cherddorfa Opera Cenedlaethol Cymru a dod yn Bennaeth Adran Delyn Coleg Cerdd a Drama Cymru. Ar y cŷd, gyda’i gŵr, Brian Raby, sefydlodd Gwmni Cyhoeddi dylanwadol Alaw, ac mae ei threfniannau a’i chyfansoddiadau hi ei hun ar gyfer y delyn i’w clywed ym mhedwar ban y byd. |
Gillian Green. Graddiodd Gillian Green o Adran Gerdd Prifysgol Caerdydd, ac wedi dilyn cwrs ôl-radd ym Mhrifysgol Llundain ymunodd â chynllun Live Music Now a sefydlodd Yehudi Menuhin. Erbyn hyn, yn ogystal a’i gwaith fel Cyfarwyddwr LMN yng Nghymru, hi yw Cyfarwyddwr Clyweliadau Cenedlaethol Prydeinig y mudiad, ac mae’n feirniad tra profiadol. Bu’n aelod o sawl mudiad diwylliannol dylanwadol. |
Ann Griffiths: Wedi graddio yn y Gymraeg, ennillodd ysgoloriaeth i astudio gyda’r athro byd-enwog, Pierre Jamet, ym Mharis, lle cipiodd wobr gyntaf (Premier Prix) y Conservatoire. Derbyniodd radd M.A am ei hastudiaethau i hanes y delyn, cyn treulio cryn amser yn dysgu’r delyn yn y Brifysgol, yr Academi Frenhinol yn Llundain, a’r Coleg Cerdd a Drama yng Nghaerdydd. Mae’n hanesydd y delyn, a chanddi 46 o erthyglau yng Ngeiriadur Cerddorol Grove |